達明一派發了新歌"寂寞的人有福了"上電台，於收音機草草收聽之下發覺歌詞非常普通，和編曲及旋律亦不太配合，感覺居然比當年初聽"每日一禁果"時更不堪...
歌其實不是真的很差，作為大碟side track相信是綽綽有餘了，但作為一首十年以來的第一派台歌，大概應派一首更為先聲奪人的吧，這首歌不管編曲或歌詞都委實有點普通，再加上對達明一派的期望...結果自然是很有點失望，希望不會是為趕十二月的演唱會而草草交貨吧...金漆招牌一樣很容易可以砸碎的。
不過，話說回來，以達明一派的江湖地位，那首歌反正是必定會有四台冠軍的，可能故意選較差的讓人播著播著聽著聽著就習慣了。
(順帶一提，時至今日我仍未能接受"每日一禁果"這首歌，歌詞雖有趣但太強勁的鼓實在有點刺耳...是不是有點矛盾呢)
Subscribe to:
Post Comments (Atom)
9 comments:
朋友,你可以話唔鐘意聽呢首歌,但你沒必要懷疑1)達明是為了演唱會草草交貨;2)故意選較差的歌派台,完全冇根據,係咪吹水吹得過分左?
第二,你有咁多意見,無論要讚要彈,你係咪應該最少都聽多幾次,細心聽過之後先作出呢個評論呢?你自己都識講係"草草收聽"..."草草收聽"又點會聽到一首歌有咩好同唔好呢?
第三,你話呢首歌歌詞普通,會唔會係你冇乜思考過呢首詞有乜意義?不如你再聽多幾次達明想透過首歌講乜?想對佢地的歌迷講乜?尤其係最後幾句,"我所愛的已經共我團聚",清楚不過了吧!!
第四,甚麼"必定會有四台冠軍"??朋友,不要再沉迷甚麼流行榜吧!你以為達明會介意自己既歌係咪no.1? 甚麼"達明一派的江湖地位",你知唔知佢地點解復出?唔係因為咩有江湖地位,係因為兩人都想與對方一聚,想同歌迷分享,想為人民服務!!你不了解達明不緊要,但希望你不要用你的價值觀去諗達明!
順帶一提,你話"每日一禁果"太強勁的鼓實在有點刺耳,既然你對音樂的接受能力係咁低,以你的層次,你實在不應對達明一派有任何期望,你不如去聽Kenny G吧!一定唔會刺耳!!
如果草草收聽的意見未足採信，閣下又何苦鍵下洋洋數百字去為達明一派申冤抱不平？所以我認為，其實閣下是很在意我的言論的，為此我決定給閣下一個詳細的回覆。
首先，我指達明是為了演唱會草草交貨及故意選較差的歌派台，是有根據的，不是「吹水」的。證據就是他們這次的歌感覺很平凡，很普通，驚喜欠奉，直至現時，該歌曲已派台接近一個月，我仍不認為有需要修正之前的言論。倒不如閣下提出你認為他們不是草草交貨或故意選較差的歌派台的根據？
其次是有關歌詞的指控，我想如果區區一句語帶相關的歌詞閣下已覺得很滿足，很「有野」，相信各下有在聽"講野"時太概會興奮得錯手殺死身邊的人。歌詞可以是簡單易明、可以是喻意深長、可以是無病呻吟、也可以是不倫不類的。到底這首歌除了說「寂寞的人有福了，因為不談戀愛也可以過得很好」和似乎令閣下拍案叫絕的「寂寞的人有福了，因為達明一派回來了」之外還有甚麼？老實說，珠玉在前，實在不覺得這歌詞有何突出過人之處，平平無奇，就是普通的同義詞吧。普通，並不等於無意思。即使是VRF的"寒冰掌"、容祖兒的”隆重登場”還是古天樂的"今期流行"，一樣是有其意思的。
寫作神奇的地方，就是常常會發覺讀者會從你的文字中看到一些你從來未想過的事。「甚麼"必定會有四台冠軍"??朋友,不要再沉迷甚麼流行榜吧!你以為達明會介意自己既歌係咪no.1? 甚麼"達明一派的江湖地位",你知唔知佢地點解復出?唔係因為咩有江湖地位,係因為兩人都想與對方一聚,想同歌迷分享,想為人民服務!!你不了解達明不緊要,但希望你不要用你的價值觀去諗達明!」老實說，我並未想過自己的表達能力會差到辭不達意的地步，還是因為句式太深奧複雜令人難以理解？但看見上文回應我真的禁不住疑惑︰是否我在字裡行間流露了「達明一派復出是為了在流行榜奪冠，因為他們很在意流行榜冠軍」？為此，我決定用較為淺白的廣東口語去再一次表達我的意思︰
「即係ar，達明一派心諗以自己既地位ar, 派舊屎上台ar果堆唔識聽野既人都爭住話正ga la, 你驚真係會無人播咩...咪又係會第一...求鬼奇整首出黎派住先。」
可能這種想法會冒犯閣下所愛的達明一派，但相信你也不能排除這是事實。實際上，如果此曲已是全碟最適合作為第一主打的歌曲，我實在不敢想像其他歌的水準。
另外，有關閣下「不要用自己的價值觀去評價達明一派」的建議，實在有點難度。那應該用誰的價值觀呢？達明一派自己的？我可不了解他們私下如何評價自己。還是閣下的？老實說，即使我能夠，我也不會採用。看見閣下「你知唔知佢地點解復出?...係因為兩人都想與對方一聚,想同歌迷分享,想為人民服務!!」我只覺得肉麻核突，請不神化偶像，please，很噁心。
最後，我想給閣下釐清一個概念︰接受能力高的人，不等於他會樂於接受一切事物，包括不美好的事。但不能接受批評，還會叫人「不如去聽Kenny G」的，就一定不是接受能力高的人。
歡迎繼續討論。
>>證據就是他們這次的歌感覺很平凡，很普通，驚喜欠奉，直至現時，該歌曲已派台接近一個月，我仍不認為有需要修正之前的言論。
"驚喜欠奉/平凡普通"係歌曲質素問題,係你對於歌曲的想法(當我知道你聽左一個月之後都係咁諗,我沒有話說).但你話"草草交貨/選較差的歌派台"呢個係講緊另一個問題,係更serious問題--係直接批評緊個歌手對音樂的態度,對樂迷的尊重程度,係專業,係誠信問題(冇誠信,唔專業,唔尊重樂迷的歌手先會草草交貨/選較差的歌派台).你竟然咁都分唔開?你單憑"你覺得首歌普通"而批評達明的誠信,這是我不能接受的.若果你覺得首歌普通,令你感到劉以達的作曲技術已不復當年,或者兩人再冇火花,這我還沒有話說.但而家你係講左去隔離.你講到佢地好唔尊重樂迷一樣.
你留意一下歌手的言行,訪問,新聞,甚至佢做的每一件事,你會感覺到他對音樂有幾尊重,對樂迷有幾尊重.呢d就係你對一個歌手的誠信作出評價前的基礎.我舉個例,早前阿Paul有首派台歌叫"我在存在",雖然我不太喜歡,歌曲有點平平無奇,令我有d失望.但係,我唔會因為咁樣而懷疑阿Paul係"求其"做首歌出黎(因為大把Beyondfans實會買).我唔會咁諗係因為我從第一天聽Beyond開始,佢地無論整體或個人一路以來給我"累積"的印象係好尊重音樂,好尊重樂迷的.所以絕對唔會草草交貨或者求其做首歌出來去欺騙樂迷.我反而會諗,可能今次係自己label出碟,希望做一d唔同以前的音樂,可能係一d高深d的音樂,要慢慢"dep"的音樂,未必第一次聽就鐘意的....總之唔會係是但求其欺騙樂迷.而講番達明,我希望你先去了解一下他們對音樂的態度,對樂迷的尊重程度好嗎?不要單憑對一首歌曲的感覺而判定佢地冇誠信,唔專業好嗎?簡單點說,你同好多香港樂迷一樣,唔識尊重歌手. 呢一點係我看完你第一個post之後最想講的一點. 如果你明白呢點,其他都不重要,以歌論歌冇問題,各自發表意見都好,但首先係要尊重歌手. 希望你要比多d尊重歌手同創作人.尊重呀!
>>似乎令閣下拍案叫絕的「寂寞的人有福了，因為達明一派回來了」之外還有甚麼？老實說，珠玉在前，實在不覺得這歌詞有何突出過人之處..
你對首歌詞的看法我好尊重.同我之前個post第二點一樣,無論讚還是彈,希望你聽多幾次聽真d先好講.而家你話聽左一個月都係咁,我係尊重的!
不如你聽下我點解欣賞呢首詞.其實我認為首詞未至於令我拍案叫絕但又絕對唔係普通.因為首詞表現左期待達明復出的人的心情.當我上年年尾聽到呢個消息,一直等左一年,演唱會終於成事. 作為達明迷,呢一年期間等的時間真係有點寂寞,但係到佢地真係復出的時候,真係好開心,其他事情有幾差,工作有幾辛苦,都已經唔重要,最重要係期待的日子已經來了. 就係咁.只係一首好為fans寫的歌詞,但咁已經好夠了.
>>「即係ar，達明一派心諗以自己既地位ar, 派舊屎上台ar果堆唔識聽野既人都爭住話正ga la, 你驚真係會無人播咩...咪又係會第一...求鬼奇整首出黎派住先。」
>>另外，有關閣下「不要用自己的價值觀去評價達明一派」的建議，實在有點難度。
我冇理解錯,呢一點就係我最想講的"尊重歌手"的問題.上面很長的那篇講了...多謝你轉左廣東話,但我發覺一樣都係果種唔尊重. 我而家解釋你聽.
先講對不起.因為「不要用自己的價值觀去評價達明一派」呢句係我寫得唔好---寫番?應該係「不要將自己的價值觀也當作是達明一派的價值觀」. 你既諗法係,有地位的歌手是但派舊屎上台都有一大班人捧場,一樣no.1. OK,呢個諗法係有你的理由.但係點解你要強加於達明身上?點解你要將你心諗o既野當係達明心諗既野? 達明點睇播放率,點睇有冇人聽,點睇樂壇地位,呢d都係佢地自己的價值觀,都係來自佢地對音樂的看法,對樂迷的尊重程度.你就當自己的諗法係佢地既諗法,基礎係咩?又係因為你覺得首歌普通!無驚喜!...講多次,我不能接受. 希望你再睇上面個post.
>>看見閣下「你知唔知佢地點解復出?...係因為兩人都想與對方一聚,想同歌迷分享,想為人民服務!!」我只覺得肉麻核突，請不神化偶像，please，很噁心。
我好明白你覺得噁心,但我想令你理解多一點,從而更尊重歌手. 首先呢幾個復出原因都係達明自己講的,每一個都有意思的.不是我為了神化他們而講. 我只是"轉載". 去年一個頒獎禮後明哥被訪問今年大計,他提到去年有幾位樂壇的朋友離開左(真係朋友,因為哥哥和梅姐都同明哥合作過).令他有感而發,想到是時候要找老朋友劉以達聚一聚,重組達明開演唱會.另外,為人民服務呢一點,明哥講左好多次,話達明係為人民服務絕對唔係講笑,而係佢地真係覺得自己的音樂一直以來都係將社會的文化記錄下來,反映當事社會裡的現實情況,不同階層的心聲,等等 (例如十個救火的少年,天問,排名不分先後左右忠奸..等等).呢d我都講得有道理,希望你都係.
最後, 我只可以講,我見到你第一個post就已經完全接受唔到你唔尊重歌手呢樣野.
今時今日很少人識得尊重歌手和創作人.行動上同言論上都係.至少要在"唔尊重"之前搞清楚,了解清楚你要唔尊重的對象,係咪真係咁唔值得尊重? 其實我看過你其他有關音樂的post,都沒有反感,唯獨是講呢隻歌就真係....我唔係想迫你喜歡達明,呢個唔重要. 你單憑一首歌去推翻人地的專業和誠信就係大問題. 就算我唔係達明fans,都會講同一番說話. 希望你能理解我的想法. ......好了..講夠了,總算為音樂人做番少少野.
老實說，我曾認真考慮過再用千字文去回應你，可是最後仍是放棄了，不過我的確有細心看過你的回覆。
達明的歌在為人民服務並不同於達明是次復出是為了為人民服務。
前者我非常同意，後者...恕難苟同。
林夕填出一首爛詞，例如"今期流行"，我的思考模式亦是︰
1. 我感覺那首詞填得很爛。
2. 我知道他有能力填出"似是故人來"。
3. 他大概因為某些原因而未盡全力。
我實在不認為如此懷疑是不合理或者不尊重林夕。
你似乎的確不明白那種「相較起要承認他們合作時已再無從前的火花，還是傾向相信他們也許是未盡全力罷了」的感覺。
愛的程度不同，多講亦是無謂。
我相信真理是愈辦愈明的,好希望你繼續和我辦論:
你對林夕的1,2,3的思路,係,我都同意,完全冇不尊重的含意.但在你對達明首歌同wyman填的詞又何止1,2,3呢?還多出4:
1. 我感覺那首詞填得很爛。
2. 我知道他有能力填出"似是故人來"。
3. 他大概因為某些原因而未盡全力。
4. "某些原因"可能是:"達明借住自己江湖地位,求其選首垃圾歌,草草交貨,派台都可以no.1,呃到大推唔識野的人爭住話正"
4 係有唔尊重歌手之意,簡單直接咁話:達明呃人.達明搵笨.
你舉呢個例,包裝得太好了."他大概因為某些原因而未盡全力" 好大方得體.之前呢? 是這樣的 : "以達明一派的江湖地位，那首歌反正是必定會有四台冠軍的，可能故意選較差的讓人播著播著聽著聽著就習慣了。" 點解之前唔識尊重,而家呢個所謂例子又咁識尊重呢. 你令我覺得你o係度死撐.
>你似乎的確不明白那種「相較起要承認他們合作時已再無從前的火花，還是傾向相信他們也許是未盡全力罷了」的感覺。
又是包裝得非常漂亮. 我提醒你,你那種"感覺"是
「相較起要承認他們合作時已再無從前的火花，還是傾向相信他們求其選首垃圾歌派台呃樂迷」我不明白?我好明白喎,你有呢種感覺係因為你唔識尊重歌手.
我又舉番阿Paul個例,我今次幫你(11月14日既你,真正既你)寫埋:
"最近聽到paul的新歌"我在存在"派上台,發覺旋律無驚喜,歌詞冇意思,唱方面更是不配合編曲...令我很失望呢,唔知係咪因為阿Paul上晒岸唔駛憂,呢期又掛住幫女友做碟,所以是但選首舊session錄左冇出既歌當新歌,諗住實有大把死硬Beyond fans買佢新碟.."
同一個例,對上一個post既你,包裝得好得體但其實係死撐既你,會咁寫:
"最近聽到paul的新歌"我在存在"派上台,發覺旋律無驚喜,歌詞冇意思,唱方面更是不配合編曲...令我很失望呢,唔知係咪因為某些原因,令到佢未能發揮出最好呢?我如此懷疑,冇唔尊重佢架,好合理呀,係咪."
幾好,第二段寫得幾好呀,我都同意呀,我都會咁寫呀!!
星爺套功夫冇少林足球咁好笑,故仔唔得,九成係佢明知實有咁多人睇,是但?個廢劇本加d CG就推出,搵觀眾笨!
>愛的程度不同，多講亦是無謂。
我們的不同不是因為"愛的程度不同".而是"懂尊重"跟"唔懂尊重"呢個不同.你唔想講,我唔迫你講.但你而家重未識尊重歌手,所以我係好想繼續教你去尊重歌手.甚至我可以見面或電聯同你講,咁樣可以直接些.真的,希望你可以比機會我令你改變呢個唔好的心態.
真理的確是愈辯愈明，但和一個思考混亂的人試圖去明辨真理，卻很累人。
其實，早前我並不太理解到底「不尊重」的指控從何而來，直至看見你上一篇留言，我就懂了，大概你根本一直曲解我文章的意思，然後就自說自話。讓我舉個例去演繹你的理論︰
一個學生功課交行貨，佢自己就講到誓誓旦旦話自己好俾心機。之前明明做得好掂既，今次就交pat屎出黎，於是，老師該點做呢？
1. 懷疑佢其實因為某些原因而未盡全力
2. 懷疑佢"會唔會可能去左玩呢？去左溝女呢？去左偷懶呢？"
按你的分類，選擇一就很尊重學生。選擇二就很不尊重學生。我想，你這個分類很不正常，很不合理，亦與尊重無關。實際上，到底分別在哪？就是懷疑的時有沒有舉例？和舉了些甚麼例？
其實還可以選擇三︰
3. 懷疑佢”會唔會要教細佬妹做功課呢？亞爸突然失業要做parttime幫補家計呢？病左一輪呢？”
如果這樣，又是否尊重呢？到底問題出於哪裡？
依我觀察，其中一個可能性就是你根本在自己胡思亂想，覺得「真正的我」已經判了他們死刑。
1. 佢地呃人(這是一個指控)
2, 佢地可能呃人(這是一個懷疑的言論)
我亦同意在沒有任何確實證據下指控別人的選擇一是一個很不尊重別人的說法，但實際上我在文中寫的是類似選擇二的用法，如果你不能清楚分辨兩句的之間的分別，那是你閱讀障礙的問題，而實際上我們本身對尊重的看法或許甚為一致。
另外一個可能性，就是你覺得「懷疑他們偷工減料」已經是不尊重他們，那我會想，達明都是普通人，不是神，我實在想不到原因為何連懷疑他們亦是不應該的，難道他們一定不會偷工減料？一定不會騙人？
為甚麼可以如此盲目去相信一個偶像？
答案很簡單，我亦想不出第二個︰fans的盲目心理。
老實說，做fans，有fans心態是無所謂的，可是強逼其他人對你的偶像有著像你一般的崇拜，否則就是不尊重的話，就是過份，亦是愚昧。
以為上綱上線，不斷地把問題扯往「尊重藝人」的層面上，就能堂而皇之地維護自己偶像兼教訓別人，我只覺得蠢，亦甚多餘。
Post a Comment